Höfuðstöðvar Alcoa til Íslands!

Fáum höfuðstöðvar Alcoa til Íslands.  Gefum þeim vilyrði fyrir álverum við Húsavík, á Keilisnesi og í Helguvík (ef þeir eru að taka yfir Alcan) með því skilyrði að þeir flytji höfuðstöðvar sínar til Íslands.

Þá fáum við loksins þau störf sem við viljum fyrir álverin.

Hér eru lágir fyrirtækjaskattar, ágætt framboð á velmenntuðu starfsfólki, ágæt þekking á áliðnaði, góðar samgöngur við umheiminn, við erum staðsett mitt á milli Evrópu og Ameríku með beint flug til Evrópu, Ameríku og Kanada svo eitthvað sé nefnt.  Á næstu tuttugu árum verður farið að fljúga yfir norðurpólinn og þá verðum við orðin miðdepill ferðalaga í þrjár áttir, mitt á milli Evrópu, Austur-Asíu og Ameríku. Alcoa eru að skoða álver á Grænlandi þannig að Ísland gæti að mörgu leyti hentað þeim ágætlega.

Bjóðum þeim þetta og hugsanlega fleiri stórfyrirtækjum.  Byrjum þó á Alcoa og verum ekkert að leyfa þeim að reisa álver hérna fyrr en þetta er í höfn.  Þá fáum við skatta af hagnaði Alcoa International.  Við gætum ráðið nokkra hjúkrunarfræðinga fyrir það!

Athugasemdir

[Pétur Þorleifsson , 9.7.2007 kl. 22:53]

Heldurðu að þeir verði þá ekki í þeirri stöðu að gefa okkur leyfi og við verðum algjörir Alkóarar ?  Við erum kannski þegar orðin það.

[Sigurður Viktor Úlfarsson, 9.7.2007 kl. 23:01]

Það er hætta á því.  Þeir verða hins vegar ekki í þeirri aðstöðu nema við látum þá stjórna okkur. 

Við verðum líka búin með Kyotokvótann okkar þegar þessi álver verða komin á koppinn og því ekki um neitt að semja meira.  En það er satt, þeir yrðu stórir á markaðnum.  Það eru hins vegar allir stórir á íslenska markaðnum.  Hvað gerum við ef Baugur ákveður að cash-a inn og yfirgefa skerið?  Við myndum hins vegar alveg lifa það af þótt þeir færu en það væri vissulega krappur dans.  Við erum hins vegar vön kröppum dansi s.b. þorskævintýrið sem nú er í gangi og fleiri slík ævintýri undanfarnar aldir.