Afar slök blaðamennska - Á að greiða blaðamönnum pr. orð sem þeir skrifa?

Það er aum blaðamennska sem gengur út á að gera fullkomlega eðlilega hluti tortryggilega. 

Þetta fólk er á fullu í borgarmálunum og þarf að setja sig inn í ólík mál tengd þeim málaflokkum sem unnið er að.  Vinnan afmarkast á engan hátt við þessa föstu nefndarfundi heldur eru þeir minnsti hluti starfsins.  Það tekur miklu meiri tíma að setja sig inn í mál milli funda og fylgja þeim eftir.

Þetta fólk er að fara reglulega úr sinni daglegu vinnu til að sinna störfum á vegum borgarinnar.  Þetta eru fullkomlega eðlileg laun og það eina rétta að um sé að ræða föst laun fyrir þetta starf.  Það á ekki að telja þarna mínútur og sekúnur í dagvinnu og yfirvinnu.  Það er einfaldlega ekki hægt og kallar á endalaus vafamál og sjálftöku með tilheyrandi tortryggni.

Þarna er þetta bara hreint og beint, föst laun upp á þessar upphæðir á mánuði, fólkið vinnur eins og það telur sig þurfa að vinna.  Kjósendur ráða síðan á fjögurra ára fresti hvort afraksturinn hefur verið nægur til að fólkið eigi skilið endurráðningu. 

Á að fella niður föst laun blaðamanna og greiða þeim fyrir hvert orð sem þeir skrifa algerlega burt séð frá því hvað undirbúningsvinnan fyrir greinina tók langan tíma?  Þetta er afar slök blaðamennska og til enn meiri lítillækkunar fyrir 24 Stundir að setja þetta á forsíðuna.

Varaborgarfulltrúar fá 300 þúsund á mánuði

Athugasemdir

[Gunnar Hrafn Jónsson (IP-tala skráð) 25.10.2007 kl. 12:12]

Tja, sjálfur fæ ég nú borgað orð fyrir orð en ég skil hvað þú ert að fara ;)

[Daði Einarsson, 25.10.2007 kl. 12:18]

Hvað ertu eiginlega að fara Sigurður? Finnst þér virkilega eðlilegt að fólk hafi þessi laun fyrir hlutastarf? Ég held að flestar sveitarstjórnir séu að greiða fólki fyrir nefndarsetu þ.e. byggt á fjölda tíma og jafnvel fleiri þáttum, en að borga fólki 300 þús fyrir 4 fundi á mánuði er nokkuð mikið.

[Jón Ingvar Bragason, 25.10.2007 kl. 12:24]

Þetta er hárrétt hjá þér Siggi. Sjálfur veit ég hvaða tími fer í þetta hjá fólki þannig að þetta snýst ekki bara um fjóra fundi á mánuði heldur allt hitt böggið líka. Síðan ef þú ert fyrsti varamaður að þá þarftu að vera alltaf til að stökkva á fund og það þýðir að þú skerðir laun annarsstaðar, einhvernveginn verður fólk að lifa...

[Sigurður Viktor Úlfarsson, 25.10.2007 kl. 13:14]

Gunnar, þér er þá semsagt borgað fyrir magn en ekki gæði.  Hjá hvaða fjölmiðli starfar þú?

Daði, meðlaun sérfræðinga t.d. viðskiptafræðinga, lögfræðinga, verkfræðinga og fleiri stétta á markaði er milli 450 og 550 þús. kr.  Borgarfulltrúar vinna stóran hluta síns starfs utan eðlilegs vinnutíma og því eðlilegt að þeir séu að fá rúmlega ofangreind tímalaun.  Það er því ekkert óeðlilegt við þessi laun.  Það að fólk sé á föstum launum kemur í veg fyrir sjálftöku og tortryggni sem leiðir af því að sjálftaka sé möguleg.  Sé mönnum borgað pr. fund þá hafa þeir tilhneigingu til að halda fundi þegar þeir hefðu getað leyst málið í gegnum síma eða tölvupóst svo eitthvað sé nefnt.

[Sóley Tómasdóttir (IP-tala skráð) 25.10.2007 kl. 13:25]

Hvað sjálfa mig varðar, þá reyndi ég að hafa mín nefndarstörf í hlutavinnu, en það gekk ekki upp. Það er ógerlegt að vinna þessa vinnu almennilega samhliða fullri vinnu. Blaðamaður hefði átt að skoða aðeins hvort og þá hve mikið varaborgarfulltrúarnir starfa fyrir utan það sem þeir fá greitt fyrir hjá borginni.

Auk þess get ég fullyrt að fjöldi funda er stórlega vanmetinn, því hvergi er minnst á undirbúningsfundi, samráðsfundi með fag- og hagsmunaaðilum, meiri- eða minnihlutafundi eða störf í ótal starfshópum og smærri nefndum á vegum fagráðanna sem ekki er greitt fyrir sérstaklega. Tel því helst til ómakelga að fólki vegið.

[Sigurður Viktor Úlfarsson, 25.10.2007 kl. 13:38]

Lykilatriðið sem gleymist oft í öfundsýkis-, tortryggnis- og skítkastsumræðunni er að við viljum að þetta sé vel launað.  Við viljum fá þarna öflugt fólk.  Við viljum ekki að það sé að taka þetta að sér með hangandi hendi og gangverðið á því fólki sem við viljum fá þarna inn til að sjá um þessi mál fyrir okkur er eins og ég sagði hér að ofan 450-550 þús. kr. á mánuði. 

Ef við viljum að fólk sinni þessu eins og Sóley nefnir hér að ofan þá verðum við að tryggja að það þurfi ekki að vera í vinnu einhvers staðar annars staðar til að eiga í sig og á.  Sá tími sem þetta ágæta fólk nýtir í önnur störf nýtist okkur alveg örugglega ekki í rekstri borgarinnar.

[Einar Jón, 25.10.2007 kl. 14:37]

Má ekki bara binda þetta við laun leikskólakennara?

Ætlar einhver að halda því fram að þetta sé tvöfalt meiri/mikilvægari vinna en leikskólakennari skilar af sér á einum mánuði?

[Sigurður Viktor Úlfarsson, 25.10.2007 kl. 14:49]

Einar Jón , þrátt fyrir útbreyddan misskilning eru laun ekki greidd eftir mikilvægi starfsins heldur eru þau greiðsla fyrir vöru (tíma starfsmanns) á markaði og ráðast því til lengri tíma af framboði og eftirspurn tiltekinnar hæfni á markaði.  Ástæðan er líklega sú að það er í besta falli afar erfitt, tilfinningaþrungið og pólitískt að ákveða mikilvægi starfa því flest störf eru ómissandi þrátt fyrir að kirkjugarðar heimsins geymi reyndar ómissandi fólk gærdagsins.

Markaðsverð leikskólakennara er því miður ekki svona hátt.  Ástæðan fyrir því er líklega sú að það ríkir fákeppni á þeim markaði þar sem sveitarfélögin hafa svo mikla markaðshlutdeild að þau ráða verðlagningu á markaði.  Öfugt við til dæmis verkfræðinga þar sem sveitarfélögin þurfa að keppa við t.d. verkfræðistofur, banka og fleiri aðila og verða því að greiða samkeppnishæf laun.

Það fólk sem við viljum fá í borgarfulltrúann er velmenntað og öflugt fólk sem er tilbúið að láta til sín taka og leggja töluvert á sig.  Verðið á þeim hópi á markaði er það sem ég nefndi hér að ofan og er þá ekki vel í lagt.  Hin leiðin er sú að borga borgarfulltrúum eftir menntun með hliðsjón af markaðsvirði menntunar þeirra en ég er ekki viss um að það væri mikil ánægja með það fyrirkomulag enda ekki farið fram á tiltekna menntun í starf borgarfulltrúa.

[Einar Jón, 25.10.2007 kl. 15:08]

Einmitt það sem ég vildi fá fram. Þú ert að halda því fram að: Markaðsverð fólksins sem við viljum fá í þessar stöður er 450-550þús á mánuði í 100% starfi og 300þús á mánuði er sanngjarnt fyrir vinnuframlag þessa fólks á fundum. Þar af leiðir er 300/450-550 er 55-66% af "markaðsvirði" þeirra.

Ég er 100% sammála Sóleyju um að það er ógerlegt að vinna þessa vinnu almennilega samhliða fullri vinnu, enda er ekki farið fram á það. Ég geri ráð fyrir að u.þ.b. 1-1.5 dagur á viku (20-30% starf) fari í þessi störf.

En ef varaborgarfulltrúar eru að eyða minna en 20-25 klukkustundum á viku í störf í þágu borgarinnar er þetta fullhátt. Erum við ekki öll sammála um það?

[Sigurður Viktor Úlfarsson, 25.10.2007 kl. 15:24]

Já, ég mundi telja að fyrir þessa upphæð mætti fara fram á a.m.k. 20-25 klukkustunda vinnu á viku í störf í þágu borgarinnar og jafnvel vel það.

Sóley, hvað telur þú að þú eyðir miklum tíma að jafnaði í þitt starf?  Væri athyglisvert að heyra það frá innanbúðarmanneskju.  Ég efast ekki um að það nái þessum tímafjölda.  Hann er mjög fljótur að koma.

[Sigurður Viktor Úlfarsson, 25.10.2007 kl. 15:26]

...vil bæta við af því þú talar um "á fundum".  Ég tel vinnuframlagið vera mikið meira en "á fundum".  Það er undirbúningur fyrir fundi, lestur á skýrslum, sími, tölvupóstur o.s.frv. sem tengist því sem við viljum ná út úr þessu fólki.

[Sóley Tómasdóttir (IP-tala skráð) 25.10.2007 kl. 16:31]

Sæl aftur. Það er alveg ljóst - og ég ætla ekki að deila við neinn um það - að hækka þarf laun leikskólakennara eins og annarra láglaunastétta. Verðmætamatið er fáránlegt og ég mun gera það sem í mínu valdi stendur til að hækkanirnar verði eins miklar og mögulegt er. Hvað vinnuframlagið varðar, þá held ég að þér sé alveg óhætt að þrefalda þessar 20-25 klst Sigurður... sem er náttúrulega allt of mikið!

[Sigurður Viktor Úlfarsson, 25.10.2007 kl. 16:53]

Takk fyrir þetta Sóley.  Þetta þýðir að um er að ræða fullt starf og rúmlega það og launin því óeðlilega lág miðað við ofangreindar forsendur fyrir launum hópsins.

Mér finnst það klárlega vera frétt í fjölmiðli hvað þessi hópur er með í laun þar sem fjölmiðlar eru fjórða valdið og eiga að fylgjast með því sem er að gerast (checks and balances) meðal kjörinna fulltrúa og veita þeim aðhald.  Hins vegar leiðist mér ótrúlega blaðamennska sem gengur ekki út á að veita upplýsingar og fjalla um mál af heilindum heldur að gera hluti tortryggilega sem á engan hátt eru tortryggilegir s.b. umræðuna hér að ofan.  Slík meðferð á fullkomlega eðlilegri frétt telst einfaldlega vera vond blaðamennska og grefur undan trúðverðugleika fjórða valdsins.

P.s. Þess má þó geta að í umræðum og framkomu borgarfulltrúa allra flokka undanfarnar vikur hafa þeir svo sannarlega gerst sekir um að beita sömu tækni í sínum málflutningi, þ.e. að gera hluti tortryggilega sem hafa ekkert til þess unnið til þess eins að kasta skít í fólkið í hinu liðinu og hefja sjálfa sig á stall.  Það hefur ekki talist þeim til framdráttar þótt síður sé frekar en blaðamanninum hér að ofan.

Má því í raun segja að þarna hafi skrattinn hitt ömmu sína og væri óskandi að báðir aðilar tækju það til sín.

[Einar Jón, 25.10.2007 kl. 19:22]

Sóley: 60-75 vinnustundir á viku í kringum einn fund? Þú hlýtur að eiga við á mánuði, eða vera mjög seinvirkur starfskraftur.

Ef þú ætlar virkilega að halda því fram að varaborgarfulltrúar eyði 240-300 vinnustundum á mánuði í störf í þágu borgarinnar, þarf greinilega að endurskoða eitthvað.

[Ari Guðmar Hallgrímsson, 26.10.2007 kl. 13:10]

Ekki hefði ég áhuga á því að vera með manneskju í vinnu sem,væri að eyða 60-70 klst á viku í aukavinnu,þetta er ekkert nema rugl,þetta er upp til hópa ekkert merkilegra fólk en Pétur og Páll,en vill ,ganstætt þeim láta bera á sér.Ef hægt er að greiða þeim 300 þús á mánuði fyrir aukavinnu því ekki að bæta 100 þús kalli við og njóta þeirra frábæru starfskrafta til fulls.