Ungt glæsilegt fólk - Gjöf skátastarf til samfélagsins

Sjálfstætt, virkt og ábyrgt, glæsilegt ungt fólk er besta gjöf sem hægt er að gefa samfélagi.

Skátahreyfingin er stærsta æskulýðshreyfing heims með um 40 milljónir virka þátttakenda í 155 löndum heims.  Til samanburðar eru allir íbúar Norðurlanda um 25 milljónir.  Um 500 milljónir manna hafa tekið þátt í skátastarfi á þeim hundrað árum sem skátastarf hefur verið við líði.  Markmið skátastarfs er að þroska og efla ungt fólk til að vera sjálfstæðir, virkir og ábyrgir einstaklingar í samfélaginu.

Frá því 1965 eru forsetamerkishafar orðnir á þrettánda hundrað!  Þetta öfluga fólk er á öllum aldri og starfar á öllum sviðum samfélagsins.  Forsetamerkishafar eiga það sameiginlegt að hafa stundað kröftugt skátastarf í 1000 klukkustundir eða meira.  Það verður því ekki hver sem er forsetamerkishafi.  Þau hafa tekist á við íslenska náttúru, þau hafa tekist á við krefjandi verkefni, þau hafa fengið tækifæri til að vinna með alls konar fólki og þau hafa lagt sig fram um að verða örlítið betri einstaklingur í dag en í gær með áherslu á gildi þess að hafa jákvæð áhrif á samfélagið í kringum sig, samvinnu, frið, náttúrurvernd og þá staðreynd að hlutir gerast ekki af sjálfu sér heldur þarf að framkvæma til að ná árangri.

Til hamingju Ísland með þetta glæsilega fólk og forsetamerkishafar, til hamingju með daginn.

Skátar taka á móti forsetamerkinu á Bessastöðum