Skelfileg niðurstaða - Kosningar NÚNA!!!!

Þetta er skelfileg niðurstaða!!!  Mesti skaði sem stjórnmálamenn hafa gert í áratugi.

Það er ekki nóg með að stærsta tækifæri Íslandssögunnar, orkuútrásin, sé í uppnámi heldur eru helstu sérfræðingar OR í stórhættu.  Samningurinn gekk út á að þetta útrásarfyrirtæki ásældist ekki starfsmenn OR en OR ynni þess í stað fyrir REI fyrir hundruð milljóna á ári næstu 20 árin.  Þessu ætla stjórnmálamennirnir öllu að kasta á glæ.  Nú mun Geysir Green væntanlega sækja þessa starfsmenn OR gera þetta sjálft.

Auk þess mun orkuútrásin snúast upp í margra ára skaðabótamál fyrir dómstólum þar sem OR eða eigendur þess verða krafin um tugi milljarða í skaðabætur.  Varla mun REI geta gert mikið af samningum á meðan.  Ef ekki er ástæða til að krefjast kosninga núna þá veit ég ekki hvenær.

Eina ástæðan fyrir þessu er sú að þessir sömu stjórnmálamenn eru búnir að viðhafa svo stór orð í þessu máli að þeir geta ekki bakkað út úr þeim þótt ekkert sé athugavert við málið.  Enn og aftur snýst þetta um framhleypni og einkahagsmuni stjórnmálamannanna.

Það er algerlega magnað að það skuli vera stjórnmálaástandið á Íslandi en ekki í Djibuti sem drepur orkuútrásina.

Borgarráð samþykkir að hafna samruna REI og Geysis Green

Athugasemdir

[Guðmundur (IP-tala skráð) 1.11.2007 kl. 11:52]

Get tekið undir það sem hér er sagt. Það er með ólíkindum að stjórnamálamenn séu farnir að vasast í því að ætla að stjórna fyrirtækjunum og síðan að taka upp aftur ákvarðanir sem eru klárlega á móti langtímahagsmunum Reykvíkinga. Þetta er svona eins og kaupa sér einn nýjan Range Rover og selja hann síðan daginn eftir með afföllum. Það er eins og sagt er það er kjörbúðarlýðræði á Íslandi en lýðræði stjórnmálanna eru önnur. Kannski er kominn tími til þess að reyna að losna undir þessu sífellda narti stjórnmálamanna með stjórnarsetu. Kannski væri hægt að auka ábyrgð og skilvirkni ef það væru sérstaklega kosnir hæfir einstaklingar á 4 ára fresti til þess að sitja í stjórnum þessara fyrirtækja til þess einmitt að takmarka nartið því eins og alþjóð veit þá veit ekki á gott að narta sífellt á milli mála. 

[Sævar Einarsson, 1.11.2007 kl. 11:54]

Kjósa aftur og svo skaðabótarmál ? Þeir sem eru við völd voru kosnir alveg eins og þeir sem eru núna í minnihluta og voru í meirihluta og hvernig er hægt að fara fram á skaðabætur þegar ólöglega var staðið að samruna ?

[Heimir Lárusson Fjeldsted, 1.11.2007 kl. 12:00]

Borgarfulltrúar telja að stundarhagsmunum sé borgið.

[Ellert Smári Kristbergsson, 1.11.2007 kl. 12:34]

Hvernig á þetta eftir að koma í veg fyrir útrás orkufyrirtækja á Íslandi?

Ef Svandís hefur rétt fyrir sér þegar hún segir "að þverpólitísk samstaða hefði verið um þessa niðurstöðu ". Hvern ætlar þú þá að kjósa?

[Sigurður Viktor Úlfarsson, 1.11.2007 kl. 12:49]

Aðra einstaklinga í borgarstjórn.  Þetta er mál einstaklinganna en ekki flokkanna.  Það er ekki samstaða um þessa niðurstöðu í flokkunum sjálfum.  Undirrót þessarar niðurstöðu er persónuleg meðal borgarfulltrúa.  Þeir voru búnir að nota svo stór orð í umræðunni að þeir gátu ekki bakkað út úr þeim.

Slembinn, það fyrirtæki sem fer verst út úr þessu er Orkuveitan.  Hún mun þurfa að greiða skaðabæturnar sem GGE mun fara fram á vegna riftunar samningsins og sameiningarinnar.  Löggiltir fulltrúar eigenda voru búnir að samþykkja þessa hluti.  Samningurinn hvað á um að REI ásældist ekki starfsmenn OR næstu 20 árin.  Ef GGE sameinast ekki REI þá hljóta þeir að gera þetta sjálfir og sækja það starfsfólk sem þeir þurfa til þess.  Allar starfsmenn OR þekkja Ásgeir Margeirsson af góðu einu og munu glaðir vinna fyrir hann.  Markmiðið með stofnun REI var ekki að Orkuveitan notaði sitt fé í útrásina.  Það átti að fá einkaaðila til að setja pening í dæmið og OR kæmi með þekkinguna.

Eina vonin er líklega sú að farið verði aftur í gegnum sameiningarferlið og samningagerðina og úr verði nokkurn veginn sami hlutur aftur.  Sömu aðilar samþykki niðurstöðuna og samþykktu hina niðurstöðuna og að almenningur verði látinn halda að eitthvað hafi breyst.

[Ellert Smári Kristbergsson, 1.11.2007 kl. 13:41]

Það er ekkert sem bendir til þess að ekki verði hægt að ná sáttum um þessa hluti og að GGE muni fara fram á tugi milljarða í skaðabætur. Það er ekki enn búið að útfæra hvernig samruninn mun ganga til baka. Svo mér sýnist frekar snemmt að vera að fullyrða eitthvað um skaðabótamál.

Nú hefur verið fjallað um þetta mál innan starfshóps sem samanstendur af fulltrúum allra flokka. Þeir komust meðal annars að þeirri niðurstöðu, eftir að hafa fundað nánast daglega, farið yfir ýmis gögn er varðar málið og talað við ýmsa aðila sem að málinu koma, að, svo ég vitni bara beinnt í greinagerðina:

 " Ljóst er að við skoðun á þjónustusamningi eða einkaréttarsamningi, sem er ein helsta forsenda samrunans, koma í ljós efnislegir þættir sem ekki verður við unað með hagsmuni Orkuveitu Reykjavíkur að leiðarljósi. Er þar helst að nefna þætti sem varða tímalengd samningsins og skuldbindingar til svo langs tíma, notkun á vörumerki fyrirtækisins án takmarkana og óháð eignarhluta Orkuveitunnar í því fyrirtæki sem um ræðir".

[Sigurður Viktor Úlfarsson, 1.11.2007 kl. 13:51]

Já Ellert,

Eins og ég segi í næstu færslu á eftir þessari í blogginu mínu þá vonum við að niðurstaðan verði sú að málið verði einfaldlega klárað með einhverjum breytingum á þessum samningum.  Þá geta stjórnmálamennirnir hrósað sigri án þess að slátra mjólkurkúnni.

Tímalengd upp á 20 ár er ekkert mjög löng í þessum bransa.  Hann vinnur til langs tíma.  Hins vegar get ég verið sammála þeim varðandi notkun á vörumerki fyrirtækisins óháð eignarhluta OR í REI.  Þar tel ég að gengið hafi verið nokkuð greitt til verks í þessum samningi sem annars er að langmestu leyti mjög góður.

[Ellert Smári Kristbergsson, 1.11.2007 kl. 14:22]

Þar er ég sammála þér. Þó mér fynnist líka svolítið leiðinlegt að Hitaveita Suðurnesja skuli vera þarna inní. Ég get ekki séð hvað hún kemur útrás orkufyrirtækja við og get ekki skilið hversvegna hún var sett undir REI.

Og svona ef við myndum kjósa aftur núna til þess að mótmæla þessari niðurstöðu þá getum við útilokað sjálfstæðisflokkinn því hann er búinn að lýsa yfir ánægju sinni með þessa niðurstöðu. "Sjálfstæðismenn mjög sáttir við niðurstöðu borgarráðs".

Takk fyrir.

kv. Smári.

[Sigurður Viktor Úlfarsson, 1.11.2007 kl. 14:37]

Ég efast stórlega um að núverandi borgarfulltrúar Sjálfstæðisflokksins myndu lifa af prófkjör þessar vikurnar.  Það væri hreinsunin sem ætti sér stað.  Þegar hún væri um garð gengin þá mættu þeir taka við aftur.

Það sem GGE var að kaupa í HS var fyrst og fremst aðgangur að starfsmönnum, rannsóknum,  fræðilegum grunni HS og þekkingu á rekstri jarðvarmaorkuvera á Reykjanesi.  Þá þekkingu ætluðu þeir síðan að flytja út.  OR hefur ákveðið að það væri eðlilegt að sameina þessa hluta fyrst þeir voru að vinna saman á annað borð. 

Í sameiningarferli GGE og REI var sérstaklega tekið fram að þeir vildu aðskilja opinbera hluta HS.  Hver niðurstaðan verður í því máli veit ég ekki.  Ef Reykjanesbær eða Hafnarfjarðarbær vilja nýta sér forkaupsréttinn þá hljóta þeir að gera það.

Annar möguleiki í stöðunni er auðvitað sú að HS og OR sameinist og að Reykjanesbær og Hafnarfjörður komi inn í OR sem hluthafar.  Það er hins vegar ekki víst að samkeppnisstofnun myndi leyfa þann samruna, sérstaklega í sölu og framleiðslu á rafmagni sem er á samkeppnismarkaði.

[Steinar Frímannsson (IP-tala skráð) 1.11.2007 kl. 18:45]

Þetta er skelfilegt mál frá upphafi til enda. 

Fyrst og fremst.   Hvers vegna þurfti að setja stjórnarmenn OR í þá stöðu að þurfa að samþykkja sameiningu félaganna með svona bráðum hætti?   Var eitthvað slæmt við það að þeir sem þurftu að taka ákvörðun hefðu tíma til að skoða málið?    Þarna voru greinilega starfsmenn OR (stjórnendur)  sem pressuðu málið í gegn.   Í hverra umboði voru þeir að vinna?   Alla vega verður að viðurkenna að þarna er rót málsins

Það koma upp fleiri mál í þessu.  Hjörleifur Kvaran ákveður upp á sitt eindæmi að krefjast frávísunar í dómsmáli sem allir vilja fá efnislega niðurstöðu í.   Í umboði hvers?    Borgarlögmaður sendir Umboðsmanni Alþingis þar sem haldið er fram að Borgarstjórn og Borgarráði komi málið ekki við.   Í umboði hvers var hann að vinna. Og svona má lengi telja.  

Þá er spurning:   Hvað á Borgarráð að gera?   Sennilega var þetta illskársti kosturinn.  

Ef upp koma skaðabótamál verður að skoða hvar er rót vandans.   Hver gerði t.d.  samning sem skuldbatt OR til 20 ára varðandi erlend verkefni?   Hverjir hafa haldið upplýsingum frá Stjórn og Borgarstjórn?   Geta þeir sem þannig hegða sér verið endalaust lausir allra mála.   Mér sýnist að það sé kominn tími til að hreinsa til.  

Ég sé að Björn Bjarnason hefur vitnað í sína reynslu af því að sitja í stjórn OR.    Þegar upp er staðið ber stjórnin ábyrgð á störfum fyrirtækisins og það er mjög alvarlegur hlutur að halda upplýsingum frá stjórnarmönnum.   Þetta vandræðamál er tilkomið vegna slíkrar hegðunar.    Þeir sem bera endanlega ábyrgð virðast einfaldlega búnir að fá nóg.

En Siggi.  Þín afstaða mótast e.t.v. af því að sá sem er stöðugt í skítalykt,  hættir fyrr eða síðar að finna hana. 

Kveðja

Steinar Frímannsson

[Sigurður Viktor Úlfarsson, 1.11.2007 kl. 23:46]

Sæll Steinar,

Hjartanlega sammála þér um skelfileika málsins.

Stjórnarmenn bera eins og þú segir ábyrgð á rekstri fyrirtækisins.  Ef þeir telja sig ekki hafa nægar upplýsingar til að taka ákvörðun eða ekki nægan tíma til að setja sig inn í málin hvernig dettur þeim þá í hug að taka ákvörðunina?  Þeir ráða því algerlega sjálfir.  Það hlýtur að vera á þeirra ábyrgð.  Fulltrúar allra flokka í stjórn nema VG greiddu atkvæði með samrunanum.  Ef þeir töldu sig ekki hafa nægilegar upplýsingar hefðu þeir átt að fresta ákvörðuninni þangað til þeir voru nægilega upplýstir og höfðu haft tíma til að setja sig inn í málin.

Menn hljóta að gefa sér það að þær ákvarðanir sem stjórnarmenn taka séu með umboði baklandsins sem stjórnina skipar, sérstaklega þegar stjórnin er skipuð oddvitum allra flokka í borgarstjórn.  Hafi Villi ekki haft umboð síns fólks til að taka þessa ákvörðun þá er það algerlega innanflokksmál hjá Sjálfstæðismönnum og hefur ekkert með stjórnendur OR eða fulltrúa annarra flokka að gera.

Mál Svandísar er ekki dómtækt.  Borgarstjórinn í Reykjavík, bæjarstjórinn á Akranesi og sveitarstjórinn í Borgarbyggð eru þeir sem halda á eigendabréfunum og sitja eigendafund.  Aðrir en þeir sem boðaðir eru til fundarins hafa ekki af honum lögvarða hagsmuni og því getur Svandís ekki sótt þetta mál frekar en t.d. að hún getur ekki kært fundarboð á húsfélagsfund í húsinu þínu þar sem hún hefur engan rétt til setu á þeim fundi.  Vilji nýi meirihlutinn sækja málið og fá úr þessu skorið þá sækir Dagur borgarstjóri málið fyrir hönd Reykjavíkurborgar.  Borgarstjóri er aðili að fundinum og getur sótt málið.  Það er ekki hægt að dæma í máli sem ekki er dómtækt, þannig er það bara og hefur ekkert með Hjörleif að gera.

Stjórn OR samþykkti 20 ára samninginn á fundi hjá sér.  Haukur, fyrrverandi besti vinur Villa og Bjarni Ármanns heimsóttu Villa og fóru með honum í gegnum samninginn 23. september.  Samningurinn var síðan lagður fyrir stjórn sem að samþykkti hann.  Ef hún taldi sig ekki nægilega upplýsta af hverju samþykkti hún þá samninginn?

Stjórnendur OR starfa alltaf í umboði stjórnar, svo einfalt er það.  Stjórn starfar síðan í umboði kjörinna fulltrúa eigendanna sem skipa stjórnina.  Í stjórn OR voru oddvitar allra flokka í borgarstjórn.  Það er nú varla hægt að starfa með mikið meira umboð en það og það er varla hægt að hafa meiri tengingu inn í borgarmálin en það - nema auðvitað hjá Sjálfstæðismönnum því þeir töluðu ekki saman sín á milli.

Það er rétt að það er skítalykt af þessu máli.  Hún kemur til vegna þess að borgarfulltrúarnir eru búnir að senda frá sér svo stór orð að þeir geta ekki bakkað aftur út úr þeim án þess að gera eitthvað.  Þá þurfa þeir að bjarga eigin skinni.  Núna eru þeir búnir með auðvelda hlutann, þ.e. að stöðva allt saman og því er allt í óvissu.  Þeir eiga hins vegar alveg eftir að taka ákvörðun um það hvað þeir ætla síðan að gera við bæði OR og REI.  Það er hin raunverulega afstaða sem allir bíða eftir.  Það verður örugglega töluvert erfiðara að ná samstöðu um það, og þó, kannski þeir ákveði að gera nýja lítið breytta samninga.  Þá geta þeir sagst hafa breytt málum, jafnvel þótt litlu sem engu hafi verið breytt og telja sig því hafa staðið við stóru orðin.  Orkuútrásin stendur og fellur með því að þeir fari þá leið.  Fari þeir hina að eyðileggja allt saman þá er OR í vondum málum og þar með hagsmunir Reykvíkinga.  Því er eðlilegt að spyrja í hvers umboði slík ákvörðun verður tekin verði hún tekin.  Sjáum til.