Röng frétt

Á þessum tímapunkti var búið að stytta kaupréttarlistann og Hjörleifur því EKKI á honum.  Fréttin er því röng og eingöngu til þess fallin að rýra trúverðugleika Hjörleifs.

Það leikur hins vegar enginn vafi á því að sem handhafi eigendabréfs OR hefur borgarstjóri á hverjum tíma lögum samkvæmt umboð til að beita því og taka ákvarðanir.  Umboð sem einhverjum er veitt til athafna miðast alltaf við það að sé eðlilegt að áætla að vafi leiki á því hvort sá sem veitir umboðið (borgarstjórn í þessu tilfelli) sé sammála þeim gjörningi sem á sér stað hverju sinni þá skal sá sem umboðið ber kalla eftir stuðningi sýns umboðsgjafans.  Þetta er hins vegar alltaf loðið og teygjanlegt og ef menn ætla að lögsækja Villa fyrir þetta þá gæti það orðið strembið.

Pólitískt umboð er hins vegar allt annað.  Miðað við lætin sem brutust út á fundinum í stöðvarstjórahúsinu 3. október meðal Sjálfstæðismanna þar sem fólk barði í borðið og öskraði hvert á annað mátti Villa vera það fullljóst að hann hafði ekki umboð til að taka þessa ákvörðun á þessum tímapunkti.  Það er pólitík og pólitíkusarnir verða að leysa það mál sín á milli.  Það er ekki lögfræði.  Það er því í raun óskiljanlegt að þau skuli enn halda hlífiskyldi yfir honum.  Líklega er það vegna þess hversu mikið þau voru gagnrýnd fyrir að fara á fundinn með formanni í haust sem þau nú hanga saman á roðinu einu saman.

Forstjóri OR álitsgjafinn

Athugasemdir

[Halla Rut , 9.2.2008 kl. 11:14]

Ertu nú viss um að þetta sé rétt hjá þér Sigurður? Voru kaupréttarlistarnir ekki styttir eftirá eða þegar allt var komið í bál og brand og Svandís svo eftirminnilega búin að öskra úr sér lungun og hóta uppljóstrun á þessu öllu, þótt annað sé í henni hljóðið í dag. Á þessum tíma hlýtur Hjörleifur að vera búin að gefa ráðið góða.

Ég er hins vegar sammála þér. Ef borgarstjóri hefur ekki þetta lagalega umboð, hver þá?

Já, af hverju gera þau það, af hverju standa þau enn með honum? Ég held að þau geri það ekki neitt í hjarta sínu en eru hrædd við að hverfa frá ein og óstudd því ég tel það vera flokksforustuna sjálfa sem stendur svona stíft við bakið á honum. 

[Einar Jón, 9.2.2008 kl. 15:44]

Mér finnst bara skrýtið/sorglegt/fáránlegt að allt tal um pólitík virðist vera farið að snúast um spurninguna "brutu þeir einhver lög?", frekar en "voru þeir að vinna af heilindum?" eða "hverra hagsmuna voru þeir að gæta?"

Er þetta virkilega aðalatriðið? 

Ef Árni Matt eða Villi væru að vinna í einkafyritæki hefðu þeir verið reknir með skömmum á stundinni. 

[Sigurður Viktor Úlfarsson, 10.2.2008 kl. 01:36]

Halla Rut,

Kaupréttarlistarnir voru styttir á fundi að morgni 3. október að mig minnir.  Þá var haldinn fundur með minnihlutanum í stjórn OR (Dagur B, Sigrún Elsa og Svandís).  Þeim var að mig minnir afhentur listi yfir eigendur REI og sáu að á honum stóð "Aðrir 2%" eða eitthvað í þeim dúr.  Sigrún Elsa kom auga á þetta og þau báðu um frekari gögn.  Var þá tjáð að þetta væru annars vegar starfsmannafélag OR og hins vegar kaupréttarhafarnir.  Síðan var þeim afhentur langi listinn sem þeim leist ekki á.  Þau styttu þann lista niður í stutta listann sem á eru einungis þeir sem sannarlega hafa beina aðkomu að útrásinni auk þess sem nýir starfsmenn fengu lakari kjör en þeir starfsmenn sem starfað hafa að útrásinni undanfarin ár.  Það voru semsagt Dagur, Sigrún Elsa og SVANDÍS sem bjuggu til endanlegan lista yfir kaupréttarhafa.  Það var semsagt áður en eigendafundurinn var haldinn um kvöldið.  Hjörleifur var því farinn út af listanum fyrir þann fund.  Hvenær hann og Villi ræddu saman veit ég auðvitað ekki.

Einar Jón, þessa dagana er einungis horft í baksýnisspegilinn.  Á meðan er söludeild íslensks jarðvarma (þ.e. REI) óstarfhæf og óhæf til að skrifa undir neina samninga eða halda út starfsemi svo nokkru nemi.  Á meðan eru auðvitað stór olíufyrirtæki og samkeppnisaðilar á fullu út um allan heim að stela kúnnunum okkar.  Fréttamenn hafa af einhverjum ástæðum veitt þessu afarlitla athygli, þ.e. hver verði næstu skref og hvenær.  Enn eru allir uppteknir við að horfa í baksýnisspegilinn.  Það eru hinir stóru hagsmunir kjósenda þessa fólks að það hysji upp um sig buxurnar og komi orkuútrásinni á sporið aftur.  Þar liggja gríðarleg tækifæri og möguleiki fyrir Reykjavíkurborg að hafa út úr því arð upp á ófá ígildi hjúkrunarheimila á næstu árum og áratugum.  Þarna liggja stóru hagsmunirnir sem við gloprum niður með hverjum deginum sem líður.