Er strákurinn ekki bara leiðinlegur???

Hvaða bull og múgæsing er þetta.  Er strákurinn ekki bara leiðinlegur eða þá að stelpan vildi fá einhverja vinkonu sína til að leigja íbúðina með sér og henti þessum Jens út, vissi ekki nafnið hans og bað Íslendinginn að hypja sig. 

Líkurnar á því að samsetning íbúa í stúdentaíbúð í Karlsrue sé farin að ráðast af framgöngu þjóða í tengslum við lausafjárkreppuna eru afar takmarkaðar svo ekki sé meira sagt.

Úthýst vegna þjóðernis

Leiðinlegt

Leiðinlegt.

Öryggisráðið hefði verið kjörinn staður til að endurreisa orðstýr Íslendinga í heiminum.

Við höfum annan bakgrunn en aðrir þegar kemur að öryggismálum og lausnum deiluefna þar sem við höfum ekki her.

Það var hins vegar ekki við því að búast að við kæmumst að eftir orrahríð undanfarinna vikna auk þess sem margir hafa örugglega sett spurningu við að kjósa okkur eftir að Rússarnir buðu okkar lán.  Ætli það standi ennþá til boða, nú þegar við erum ekki í ráðinu?

Við reynum bara aftur næst.

Ísland náði ekki kjöri

Jóni til minnkunar - Þórunn stendur í lappirnar

Hvers konar bull umræða er þetta?  Eru ennþá til svona menn, meira að segja á Alþingi Íslendinga?  Þessi fyrirspurn frá Jóni Gunnarssyni er algerlega fráleit, er honum til minnkunar og stimplar manninn sem risaeðlu í umhverfismálum.  AUÐVITAÐ á að fara fram heildstætt umhverfismat á þessari aðgerð sem og öðrum?  Ég hef áður líkt umræðunni um heildrænt eða ekki heildrænt umhverfsmat við það að leggja fjögurra akreina veg og setja hverja akrein fyrir sig í umhverfismat.  Niðurstaðan væri síðan fjórum sinnum að einnar akreina vegur hefði lítil áhrif á umhverfi sitt.

Þegar við skoðum hluti að einhverri alvöru þá skoðum við þá heildrænt.  Eftir atburði undanfarinna vikna hljótum við að gera okkur enn frekari grein fyrir þeim verðmætum sem felast í náttúru landsins og mikilvægi þess að stíga varlega til jarðar þegar við göngum á þá auðlind.  Það er lágmarkskrafa að ákvarðanir henni tengdar (sem og auðvitað ákvarðanir almennt) séu teknar á faglegum nótum byggðar á bestu fáanlegu upplýsingum.  Það er markmiðið með umhverfismati.  Umhverfismat er ekki formsatriði sem má ýta til hliðar ef kreppir að.  Umhverfismat er raunverulegt mat á því hverju við fórnum til að fá álverið. 

Með fyrirvara um umhverfismatið er ég fylgjandi álveri á Bakka en fagleg vinnubrögð í tengslum við umhverfismatið og almennt í tengslum við umgengni okkar við náttúruna eiga að vera aðalsmerki Íslendinga.  Ef fyrirtæki sem hingað koma eru ekki tilbúin að starfa hér undir mestu mögulegu umhverfiskröfum þá geta þau starfað einhvers staðar annars staðar.  Það verður ekki skortur á aðilum næstu árin og áratugina til að nýta þá orku sem við höfum upp á að bjóða.

Önnur sambærileg umræða fór af stað um daginn þegar Guðni Ágústsson hélt því fram að það ætti að auka þorskkvótann vegna dýfu í efnahagslífinu.  Algerlega fráleit hugmynd!  Stærð þorskkvótans ræðst af áætlaðri stofnstærð.  Efnahagsdýfur á þurru landi valda ekki breytingum á stofnstærð og geta því aldrei orðið ástæða breytinga á kvóta, hvorki til aukningar né minnkunar.

Ofangreind tvö dæmi eru viðkomandi þingmönnum til stórlegrar minnkunar.  Þórunn er hins vegar að standa sig mjög vel sem umhverfisráðherra.  Loksins er einhver kominn í það ráðuneyti með bein í nefinu.  Það var kominn tími til.

Allt í fína á Bakka

Verðmætum bjargað

Lífeyrissjóðirnir voru stórir hluthafar í öllum bönkunum og hafa tapað miklu í atgangi undanfarinna daga.  Gott hjá þeim að láta vaða í Kaupþing.  Þeir fá þarna góða eign á útsöluverði, eign sem innan fárra ára verður verulega mikið verðmætari en hún er í dag.  Þá hafa þeir grætt verulega á tveimur uppsveiflum Kaupþings á einu áratug og tapað á einni niðursveiflu.  Markmiðið er að enda í plús.

Lífeyrissjóðir skoða Kaupþing

Lærdómurinn: Breiðfylking í atvinnulífi stað patentlausna

Undanfarnir áratugir hafa einkennst af því að Íslendingar hafa af offorsi fleygt sér á tilteknar patentlausnir sem hafa átt að bjarga öllu.  Hin síðasta var fjármálaútrásin.  Ef við eigum að draga einhvern lærdóm af undanförnum áratugum held ég að það sé að trúa ekki endalaust á patentlausnir.

Skuttogari í hvern fjörð, loðdýrarækt á hvern bæ, Kári í Decode messías endurborinn svo kaupum hlutabréfin hans á 60 (bandaríski hlutafjármarkaðurinn hafði hins vegar aldrei heyrt manninn nefndan), internetbólan (opnaðu heimasíðu og þú verður ríkur, bjargar heiminum nema hvort tveggja sé), álver í hvern landshluta, fjármálastarfsemi eina vitið, Draumalandið hin nýja Biblía o.s.frv.

Allt hefur sinn líftíma.  Álver virkar fínt þangað til fer að fjara undan álinu og önnur efni taka við.  Þá megum við ekki vera með öll eggin í sömu körfu.  Það breytir því ekki að það er full ástæða til að reka nokkur áver á Íslandi.  Draumalandið er fín bók til að hrista upp í fólki og fá það til að hugsa út fyrir kassann.  Hún er hins vegar hvorki fræðirit né Biblía.  Skuttogarar gegna enn gríðarlega mikilvægu hlutverki í íslenskum sjávarútvegi. Decode er mikilvægt fyrirtæki fyrir Ísland en ekki eina fyrirtækið á Íslandi eins og maður hefði getað haldið á sínum tíma.

Í fyrra var þorskurinn skorinn niður um 30%.  Þá var það meðal annars flug fjármálafyrirtækjanna sem bjargaði okkur.  Núna lentu þau á nefinu og þá eru það útflutningstekjurnar af álinu, fiskinum og ferðaþjónustunni sem bjarga okkur, að hluta til vegna gengisvísitölunnar - ekki amalegt að selja fiskinn okkar til Bretlands þegar pundið slagar í 250 krónur!

Útrás fjármálafyrirtækjanna hefur verið spennandi tími og við komum út úr honum með mikla þekkingu á mörgum sviðum sem við höfðum ekki þekkingu á áður.  Undanfarin ár hafa fjármálafyrirtækin sogað til sín allt öflugasta vinnuaflið.  Nú verður breyting á því.  Þetta öfluga vel menntaða fólk mun dreifast yfir í aðra atvinnuvegi, stofna eigin fyrirtæki o.s.frv. og leiða næstu uppsveiflu á mörgum sviðum alls staðar í þjóðfélaginu.  Það er nefnilega þannig með menntun að þótt það kveikni í öll draslinu og allt fari á hausinn þá er mannauðurinn og menntunin enn á sínum stað.

Við þurfum að gera okkur grein fyrir því að auður liggur í fólkinu.  Fólkið getur síðan tekið sér allt mögulegt fyrir hendur og það eru engir smávegis kraftar að leysast úr læðingi nú þegar hundruð manna gengur út úr bankakerfinu til annarra starfa.  Vel menntað öflugt fólk finnur sér ný tækifæri, þótt það geti hugsanlega tekið nokkrar vikur eða mánuði.

Síðasta vika var alþjóðleg geðveiki.  Á næstu vikum og mánuðum mun rykið setjast.  Síðan hefst uppbyggingin, ekki bara á Íslandi heldur um allan heim.  Það að koma orkuþekkingunni í verð erlendis mun verða næsta stóra verkefni Íslendinga.  Við þurfum hins vegar að gæta þess að líta ekki á það sem patentlausn heldur reyna halda jafnvægi milli atvinnugreina.

Á hinn bóginn getum við ekki verið best í öllu og það skiptir miklu máli að sérhæfa sig.  Við þurfum hins vegar að tryggja það að við séum með eggin í nokkrum körfum.  Patentlausnir í atvinnumálum eru ekki það sem nær árangri.  Það er það sem við eigum að hafa lært af ofangreindum ævintýrum undanfarinna áratuga.

Hefja sókn á erlendum markaðssvæðum

Fyrirframgreidd orka í stað bankafyrirgreiðslu

Á bloggvef Financial Times minnist einn á þann möguleika í athugasemdum hvort hægt sé að skipta á orku sem Íslendingar eiga en Bretar þarfnast og peningum til lausnar bankakreppunni sem Bretar eiga en Íslendingar þarfnast.  Fyrirframgreidd orka er vissulega hugmynd.

Greinin er líka athyglisverð:

http://blogs.ft.com/maverecon/2008/10/icelands-bank-defaults-lessons-of-a-death-foretold/

Pundið fellur vegna milliríkjadeilu Íslands og Breta

Hvað getum við lært af Lúxemburg?

Hvað getum við lært af Lúxemburgurum?  Það að þetta örríki komist á þennan lista er mjög merkilegt.  Nú þurfum við að byggja upp nýtt bankakerfi og hljótum meðal annars að líta til árangurs örríkisins Lúxemburgar á þessu sviði.

Kanadíska bankakerfið það traustasta í heimi

Griðarlega mikilvægt að við stöndum við skuldbindingar okkar

Er staddur í Edinborg að horfa á BBC News þar sem Geir bregður fyrir á nokkurra mínútna fresti segjandi að hann haldi að til séu nægar eignir til að bjarga ICESAVE viðskiptavinum.  Þetta er stóra fréttin á BBC News núna og rúllar endalaust. 

Það er GRÍÐARLEGA mikilvægt að okkur takist að standa við skuldbindingar okkar í ICESAVE.  Annars gætu liðið fleiri ár og jafnvel áratugir áður en breskir neytendur treysta íslenskum banka fyrir sparnaðinum sínum.  Slíkur orðstýr gæti dregið verulega úr möguleikum íslenskra banka á að fjármagna sig með öðru en skuldum til mjög langs tíma.

Ernst&Young tekur yfir

Gott hjá Geir: Kreppa stækkar ekki þorskstofninn

Loksins er komin ríkisstjórn sem ákveður veiður út frá vísindum.  Núverandi kvóti er byggður á vísindum og það væri auðvitað algerlega verið að pissa í skóinn sinn að auka hann verulega vegna efnahagsástandsins.  Nú ríður á að vel sé farið með auðlindirnar.

Það sama má segja um álver á Bakka.  Það er í umhverfismati og það má á engan hátt draga úr þeim kröfum.  Hins vegar má auðvitað setja meira fé í framkvæmd umhverfismatsins ef það getur flýtt fyrir því að hægt sé að taka ákvörðun um álverið.

Vísindin ráða

Féð öruggara á Íslandi en í Skotlandi - Er að gerast um allan heim

Féð öruggara á Íslandi en í Skotlandi 

Ég bý í Edinborg í vetur þar sem konan mín er í námi.  Við vorum að opna bankareikning hérna úti og nú velti ég því fyrir mér hvort ég eigi að flytja peninginn minn sem er í Landsbankanum út eða hafa hann á Íslandi.  Ég er eiginlega kominn á þá skoðun að hann sé öruggari á Íslandi.   Þar eru fáir stórir bankar sem verður ekki leyft að fara á hausinn.  Ríkisstjórnin er auk þess búin að segjast munu tryggja allar innstæður.  Hérna er fullt af bönkum og því mun líklegra að einstökum bönkum verði leyft að fara á hausinn.  Verður það minn banki?

 Er að gerast um allan heim

Íslenskir fjölmiðlar eru uppteknir af aðstæðum á Íslandi.  Farðu inn á erlenda fjölmiðla og þá sérðu að það nákvæmlega sama er í gangi um allan heim.

Lehman brothers, 150 ára gamall banki í Ameríku, sem var skilgreindur sem einn traustasti banki veraldar er ekki til lengur.  Merril Lynch er líka farinn.  Bandaríkjastjórn tók yfir stærstu íbúðalánasjóðina og tryggingarfélagið.  Risavaxin fyrirtæki.  Nú síðustu daga hafa bankar í Evrópu fallið eins og flugur.  Í gær var talað um að þýska stjórnin hefði verið að bjarga sama bankanum í annað sinn á einni viku.  Nú er talað um að The Royal Bank of Scotland hafi verið að sækja um neyðarlán til yfirvalda.  Risavaxinn mörg hundruð ára gamall banki, gott ef saga hans nær ekki aftur á 16. eða 17. öld.  Danir hafa verið að bjarga bönkum þar, Belgar, Frakkar, Grikkir, Rússar og fleiri.

Við erum einfaldlega í alþjóðlegum ólgusjó og nú hefur ríkisstjórnin tekið sjálfstýringuna úr sambandi og stýrir skipinu handvirkt í gegnum skerjagarðinn.  Markmiðið er að takmarka tapið og koma áhöfn og farþegum í sem bestu ástandi út hinum megin.  Steininn tók úr á alþjóðlegum mörkuðum í gær, mánudag, þegar panikkástand myndaðist á öllum mörkuðum um allan heim.  Það byrjaði þegar markaðir voru opnaðir í Asíu og hélt síðan áfram þegar markaðir voru seinna opnaðir í Evrópu og loks í Ameríku.  Menn telja að 93 milljarða punda virði af hlutabréfum hafi orðið lækkuninni að bráð á breska hlutabréfamarkaðnum í gær.  93 milljarðar punda á einum degi.  Það er því eðlilegt að það gefi töluvert á bátinn á Íslandi þar sem við erum orðin virkir þátttakendur í alþjóðlegu fjármálalífi.

Útrásin hefur gefið okkur bæði þekkingu og styrk til að takast á við þetta ástand sem er núna.  Eftir niðursveifluna munum við standa miklu sterkari en við vorum áður en útrásin hófst, þökk sé þeim styrk og þeim aðgerðum sem Geir, Davíð og félagar eru að vinna í núna.  Þetta eru öflugir menn sem fara ekki á límingunum í átökum heldur standa í lappirnar og taka þær ákvarðanir sem þarf að taka þrátt fyrir misvitra aftursætisbílstjóra.  Það verður okkar gæfa.

Þetta tekur nokkra mánuði og síðan fer að vora.  Við höfum áður komið okkur í gegnum strembna vetur.

Reiðir viðskiptavinir Landsbankans