Öll eggin í sömu körfu??? - Hvað með aðra mynt en Evru???

Öll eggin í sömu körfu??
Það var athyglisvert í Silfri Egils í dag þegar Egill minntist á að útflutningur á áli stefndi í 12% af landsframleiðslu.  Það finnst mér ógnvekjandi, þ.e. að vera með öll eggin í sömu körfunni.  Hvað gerist þegar álverð lækkar t.d. vegna þess að menn finna upp önnur efni sem hafa sömu eiginleika og ál.  Eftir að Helguvík og Bakka lýkur verður vonandi snúið á aðrar brautir, aðrar körfur.  Mætti jafnvel gera það fyrr, þ.e. nýta losunarkvótann okkar í annað.

Myntmál
Eina leiðin til að taka upp Evruna er að ganga í ESB.  Það lítur allt út fyrir að búið sé að slá endanlega út af borðinu möguleikan á því að taka upp Evru einhliða.  Það er ekkert sérstaklega spennandi að hoppa á ESB vagninn og slæmt að leggja út í þann leiðangur einungis til þess að taka upp Evru.  Hvað með aðrar myntir?  Hvað með Bandaríkjadollar eða Kanadadollar svo eitthvað sé nefnt?  Hverjir eru kostirnir og gallarnir við að taka upp þær myntir?  Einhver í þættinum þínum mynntist meira að segja á norsku krónuna.  Hún sveiflast líklega ekkert mjög ósvipað íslenskum hagsveiflum sem ráðast mikið af hitastigi í sjó annars vegar og sveiflum á alþjóðlegum fjármálamörkuðum hins vegar.

Mér finnst stundum eins og ESB sinnarnir séu markvisst að halda öðrum möguleikum utan umræðunnar, þ.e. öðrum möguleikum en þeim að taka upp Evruna og til þess þurfa að ganga í ESB.  Íslendingar hafa hingað til ekki viljað ganga í ESB en margir vilja taka upp aðra mynt.  ESBsinnarnir hafa, réttilega, líklega komist að því að eina leiðin til að selja Íslendingum ESB sé að gera það í gegnum Evruumræðu.  Getum við náð markmiðum okkar um stærra myntsvæði á annan hátt er spurning sem þarf að svara.

Athugasemdir

[Jón Ingvar Bragason, 3.3.2008 kl. 10:50]

Ein helsta ástæðan fyrir því að menn tala mest um að taka upp evru er að hún er gjaldmiðill á því svæði sem íslendingar eiga mest viðskipti við, ekki síst eftir að Danmörk tekur upp evruna sem mun verða fyrr en seinna. Auk þess hefur evran sannað sig sem sterkur gjaldmiðill á móti dollaranum sem hefur sveifalst meira heldur en íslenska krónan á síðustu árum.

[Ágúst Schweitz (IP-tala skráð) 5.3.2008 kl. 14:36]

Ál eða álblanda er mjög verðmæt málmtegund, og víða fáanleg og vinnanleg úr jörðu og málmgrýti. Þó þarf að passa vel hvernig þetta er unnið, þannig að ekki komi fram málmþreyta í afurðunum. Annars er plastíkin á mikilli uppleið, til dæmis er ég nýkominn af ráðstefnu sem bar yfirskriftina "Plastic or Aluminum?" í Basel í Sviss. Þar kom fram að menn ætla að fara að nota plastík í stað áls við smíði flugvéla og flugskipa, og þetta vekur stórar spurningar þar eð mikið af áli fer í framleiðslu flugkrafta svonefndra. Í kjölfar umræðunnar komu fram áhyggjur um lokanir álvera, en Jamput Khelbar, forstöðumaður Svissnesku Plastíksamsteypunnar benti á að mjög svipuð tækni væri notuð við framleiðslu flugplastíks og áls, og því mætti ef til vill endurnýta tækjabúnað álveranna fyrir plastíkvinnslu. Þannig að ekki er nú öll nótt úti enn Sigurður.

[Sigurður Viktor Úlfarsson, 5.3.2008 kl. 17:18]

Það er rétt Ágúst en allir orkusölusamningar við álverin tengjast vísitölu álverðs þannig að ef/þegar eftirspurn eftir áli minnkar þá lækka tekjurnar okkar af orkusölunni auk þess sem umsvifin í verksmiðjunum sjálfum dragast saman. 

Það er bara almennt vont að vera svona einhæf.  Við vorum mjög háð fiskinum en höfum aðeins náð að losa okkur úr þeim klóm.  Það væri í góðu lagi að koma upp svona plastíkverksmiðjum þannig að hlutur einnar vöru (áls) í heildarkökunni stækkaði ekki meia en orðið er.  Það er komið álver í Straumsvík, álver á Grundartanga, álver á Reyðarfirði og menn eru á leiðinni í álver í Helguvík og á Bakka.  Þetta eru mjög stórar verksmiðjur, stærri en flestar aðrar sem reystar eru í öðrum geirum atvinnulífsins.  Af öllum hlutum sem hægt er að framleiða í heiminum er ekki skynsamlegt að einblína svona á eina tegund.  Álþinnuverksmiðjan í Eyjafirði, vatnsverksmiðjan hans Jóns í Þorlákshöfn, netþjónabú allt er þetta dæmi um aðra kosti sem blessunarlega eru upp á borðinu líka auk þess sem forsvarsmenn orkufyrirtækjanna hafa báðir talað um að þeir vilji í framtíðinni koma eggjunum fyrir í fleiri körfum en álkörfunni.

[Einar Jón, 10.3.2008 kl. 22:29]

Man enginn hvernig fór fyrir Argentínu þegar þeir bundu gengi síns gjaldmiðils einhliða við erlenda mynt? Það dæmi hrundi á um 10 árum... 

Ef útflutningur er almennt meiri en innflutningur er hætta á hruni.

Annars held ég að netþjónabú (þarf líklega 3 nýja sæstrengi) og jafnvel hálfleiðaraverksmiðjur (rándýr & orkufrekur hátækniðnaður) og annað í þeim dúr sé mun skynsamlegra en að hreinsa olíu og málmgrýti fyrir aðrar þjóðir.