Sjálfhverfustjórnmál - Kjörtímabilið farið fyrir bí

Ótrúlegur aumingjaskapur á klára ekki málið og höggva á hnútinn.

Þessi óvissa er óþolandi og mun gera það að verkum að næstu mánuði verða allir baktalandi alla í borgarstjórnarflokk Sjálfstæðisflokksins. Kjörtímabilið er ónýtt eins og Stefán Jón sagði með tilheyrandi tjóni fyrir Reykjavík og Reykvíkinga. Það hefði verið hægt að skapa festu ef ákvörðunin hefði verið tekin í dag en fyrst svo var ekki gert þá verður þetta einn glundroði út kjörtímabilið.

Ég kaus því miður þetta fólk í síðustu kosningum vegna þess að mér fannst það ferskt, frambærilegt og tilbúið að láta hendur standa fram úr ermum. Það má hins vegar mikið ganga á áður en ég kýs það í þeim næstu.

Ég spái því að Sjálfstæðisflokkurinn eigi eftir að tapa svakalega í næstu kosningum...og vona það eiginlega. Kjósendur eiga að senda skýr skilaboð í næstu kosningum um að svona hringlandi og sjálfhverfustjórnmál séu ekki lýðandi.

Styður yfirlýsingu Vilhjálms

Mikilvægt að skaða ekki rannsóknina áður en henni lýkur

Það er mikilvægt að fara ekki að tala um fullt af peningum í skaðabætur áður en búið er að ljúka rannsókninni á hinum heimilunum.  Það gæti spillt rannsókninni ef menn telja að því verri lýsingar sem þeir gefi nefndinni þeim mun meiri pening fái þeir frá ríkinu.  Slíkur óeðlilegur hvati gæti eyðilagt trúðverðugleika rannsóknarinnar á þeim heimilum sem eftir er að skoða og skapað hvata til að menn ásaki starfsfólk þessara heimila að ósekju fyrir eitthvað sem það hefur ekki gert.

Hins vegar finnst mér mikilvægt að ríkið tryggi eigi síðar en strax að þetta fólk fái t.d. sálræna aðstoð eða aðra þá aðstoð sem hentar hverjum og einum í því skyni að bjarga því sem bjargað verður af lífi þessa fólks.

Þetta er skelfilegt mál.

Nefndin mun fjalla um önnur meðferðarheimili

Hvað með að taka upp dollar, þá þurfum við ekki að ganga í ESB!

Hvað með að taka upp dollar, þá þurfum við ekki að ganga í ESB!

Geir: tveir kostir í boði

Hvað gerist í borgarpólitíkinni næstu tvö árin?

Það verður mjög fróðlegt að vita hvernig næstu tvö ár munu æxlast í borgarstjórnarpólitíkinni. 

Nokkrar lykilspurningar til umhugsunar:

• Mun Óskar halda Framsókn á lífi eða mun hún þurrkast út í Reykjavík í næstu kosningum?
• Mun Ólafur halda F-listanum (hvað svo sem hann er) á lífi í næstu kosningum?
• Munu Reykvíkingar fyrirgefa Sjálfsstæðismönnum bröltið eða munu þeir tapa verulega og fylgi flokka jafnast meira út (ekki helmingur Sjálfsstæðimenn og aðrir skipti síðan hinum helmingnum á milli sín eins og verið hefur)?
• Verður Villi borgarstjóri eftir ár, verður Hanna Birna það eða munu Sjálfstæðismenn sækja einhvern utan frá?  Verður það sama klúðrið og í öll hin skiptin sem þeir hafa sótt einhverja utan frá (Markús, Árni, Björn...)?  Sumir hafa talað um Guðlaug Þór, aðrir um Guðfinnu, Bjarni Ben væri líka mögulegur kandídat ef hann flytti úr Garðabænum, Ásdís Halla Bragadóttir, lengi átti ég von á því að Kristján Þór Júlíusson Akureyrarbæjarstjóri tæki Reykjavík næst eftir að hafa byrjað á Dalvík, farið til Ísafjarðar og þaðan á Akureyri.  Þá var eiginlega bara eitt eftir.
• Þetta hefur verið djöfullegt kjörtímabil fyrir borgarfulltrúa Reykjavíkur.  Ég spái því að einhverjir muni hreinlega láta sig hverfa, finna sér annan starfsvettvang og sleppa því að taka þátt í næstu kosningum og lái þeim hver sem vill.  Það skapar pláss fyrir aðra.
• Verður Svandís með í næstu borgarstjórnarkosningum eða fer hún í landsmálin og ýtir Steingrími úr formanni VG?  Hver kemur þá í staðinn?
• Nær Dagur að vinna þann stórsigur sem hann ætti að eiga möguleika á miðað við allt ofangreint eða talar hann bara í hringi og gerir ekki neitt?
• Hvaða leið verður eiginlega farin með útrás OR og samskiptin við Geysir Green?  Annað hvort verður fundin lausn á þessu eða þeir lögsækja OR upp á milljarða.  Vilja einkaaðilar taka þátt í þessu eftir þá útreið sem Bjarni Ármannsson, óskabarn þjóðarinnar, fékk í þessum hildarleik?

Hvaða áhrif hefur þetta á Sjálfstæðisflokkinn?

• Hver verður staða Geir Haarde eftir þetta?  Fólki hefur þótt hann hafa hálf lufsuleg tök á flokknum í öllum þessum málum.
• Í greininni hans Reynis hér að neðan er talað um að Þorgerður Katrín sé að grafa eigin gröf í flokknum með því að skapa ósætti innan flokksins til að ýta Villa út.

Það er engin gúrkutíð framundan svo mikið er víst!

Geir: „Tek afstöðu þegar þar að kemur“

Eru Þorgerður og Gulli að stýra atburðarrásinni...???

Athyglisverðasta frétt dagsins frá Reyni Traustasyni á dv.is

Af dv.is:

Þorgerði Katrínu kennt um

Stuðningsmenn Vilhjálms Þ. Vilhjálmssonar eru ævareiðir í garð Þorgerðar Katrínar Gunnarsdóttur, varaformanns Sjálfstæðisflokksins, sem þeir telja að hafi hrært í pottum ósamlyndis í borgarstjórnarflokknum með það fyrir augum að koma Vilhjálmi út og Hönnu Birnu Kristjánsdóttur í leiðtogastólinn. Innan úr röðum stuðningsmannanna heyrist að Þorgerði verði refsað harðlega fyrir afskiptin næst þegar forysta flokksins verður kosin. Varaformannsdagar hennar verði þá á enda.

Sú hefð hefur hefur verið uppi í flokknum að varaformaður einbeiti sér að innra starfi flokksins og styrki samheldni en hlutverk formannsins sé stefnumótun og starfið út á við. Nefnt er sem dæmi að Friðrik Sophusson hafi sem varaformaður á sínum tíma unnið hörðum höndum að því að sætta þá Geir Hallgrímsson og Gunnar Thoroddsen sem tókust á um völdin í flokknum eftir að Gunnar myndaði ríkisstjórn sína 1980. Nú þykir kveða við þann tón hjá varaformanninum að hún auki á illdeilur milli arma Geirs Haarde og Björns Bjarnasonar og beri kápuna á báðum öxlum.
Þorgerður Katrín var lengst af talin tilheyra þeim hluta flokksins sem nú er að berjast til áhrifa í borgarstjórninni. Seinna hallaði hún sér að Geir Haarde og hafa þau unnið ágætlega saman, meðal annars við myndun núverandi ríkisstjórnar. Nú telja stuðningsmenn Vilhjálms að hún hafi snúið aftur í sína gömlu herdeild og vinni gegn formanninum.

Á meðal stuðningsmanna Vilhjálms var ákaft leitað að arftaka hans í seinustu viku. Þá var það sjónarmið uppi að leita yrði út fyrir raðir borgarstjórnarflokksins til að raska ekki valdahlutföllum. Þar var nefnd guðfinna Bjarnadóttir alþingismaður. Um liðna helgi snerist viðhorfið þannig að ekki væri önnur leið fær en að halda Vilhjálmi á stóli borgarstjóra og frysta þannig sexmenningana í áhrifaleysi. Fyrir þeirri leið hefur guðlaugur Þór Þórðarsson, heilbrigðisráðherra og guðfaðir REI, ákafast talað. Guðlaugur má að sögn ekki til þess hugsa að stuðningsmenn Björns Bjarnasonar, höfuðfjanda síns, komist til valda í borginni. 

Þannig gæti farið svo að Vilhjálmur sæti út kjörtímabilið og yrði borgarstjóri að ári. Eitt helsta áhyggjuefni stuðningsmanna hans er það hvernig verði stillt upp fyrir næstu kosningar svo tryggt verði að sexmenningarnir komist ekki til valda. Þannig eru uppi raddir um að rétt væri að stilla upp en ekki að efna til prófkjörs. Helsti kandídat þessa hóps til að leiða listann er Guðlaugur Þór þórðarson en einnig er nefndur til sögunnar Borgar Þór Einarsson, stjúpsonur Geirs Haarde. Þótt orrustunni hafi lokið með því að borgarfulltrúarnir sex klöppuðu Vilhjálm upp er ljóst að stríðið stendur enn á milli fylkinganna tveggja í Sjálfstæðisflokknum. Og flestir eru sammála því að það muni renna mikið blóð áður en yfir lýkur.

Reynir Traustason - [e-mail]

Vilhjálmur: Hef axlað ábyrgð

Röng frétt

Á þessum tímapunkti var búið að stytta kaupréttarlistann og Hjörleifur því EKKI á honum.  Fréttin er því röng og eingöngu til þess fallin að rýra trúverðugleika Hjörleifs.

Það leikur hins vegar enginn vafi á því að sem handhafi eigendabréfs OR hefur borgarstjóri á hverjum tíma lögum samkvæmt umboð til að beita því og taka ákvarðanir.  Umboð sem einhverjum er veitt til athafna miðast alltaf við það að sé eðlilegt að áætla að vafi leiki á því hvort sá sem veitir umboðið (borgarstjórn í þessu tilfelli) sé sammála þeim gjörningi sem á sér stað hverju sinni þá skal sá sem umboðið ber kalla eftir stuðningi sýns umboðsgjafans.  Þetta er hins vegar alltaf loðið og teygjanlegt og ef menn ætla að lögsækja Villa fyrir þetta þá gæti það orðið strembið.

Pólitískt umboð er hins vegar allt annað.  Miðað við lætin sem brutust út á fundinum í stöðvarstjórahúsinu 3. október meðal Sjálfstæðismanna þar sem fólk barði í borðið og öskraði hvert á annað mátti Villa vera það fullljóst að hann hafði ekki umboð til að taka þessa ákvörðun á þessum tímapunkti.  Það er pólitík og pólitíkusarnir verða að leysa það mál sín á milli.  Það er ekki lögfræði.  Það er því í raun óskiljanlegt að þau skuli enn halda hlífiskyldi yfir honum.  Líklega er það vegna þess hversu mikið þau voru gagnrýnd fyrir að fara á fundinn með formanni í haust sem þau nú hanga saman á roðinu einu saman.

Forstjóri OR álitsgjafinn

Pólitískt vs. lagalegt umboð

Umboð borgarstjóra 

Það leikur enginn vafi á því að borgarstjóri hefur lagalegt umboð til að fara með eigendabréf OR á hverjum tíma. 

Það er hins vegar allt annað en pólitískt umboð.  Það verður að teljast með ólíkindum miðað við þau hörðu neikvæðu viðbrögð sem Vilhjálmur fékk á fundinum 3. október frá sínum flokkssystkinum í borgarstjórn að hann skyldi hundsa það álit samstarfsfólks síns, böðlast áfram og greiða atkvæði á fundinum með alla brjálaða í kringum sig.  Það hefur margsinnis komið fram að meðal Sjálfstæðismanna var allt brjálað á fundinum í Stöðvarstjórahúsinu á sínum tíma og Vilhjálmur lét það einfaldlega sem vind um eyru þjóta og fór sína leið.  Það lék enginn vafi á því á þessum fundi að hann hafi ekki pólitískt umboð frá sínum samflokksmönnum.

Hann hefur einfaldlega ákveðið að stjórn OR réði þessu, skítt með álit borgarfulltrúanna, og hann hafði meirihluta stjórnar á bakvið sig, þ.e. Hauk Leósson, Björn Inga og sjálfan sig.

Nú eru bæði Haukur Leósson og Björn Ingi farnir og augljóst að farið er að styttast í að Villi fari sömu leið. 

Umboð forstjóra OR

Það hefur verið ljóst allan tímann að þeir sem leiddu allt REI-dæmið voru stjórnarmenn meirihlutans í OR og forstjóri og aðrir starfsmenn fyrirtækisins fylgdu þeirra skipunum í störfum sínum.  Forstjóri ber ekki ábyrgð gagnvart borgarstjórn eða borgarráði.  Forstjóri ber ábyrgð gagnvart stjórn fyrirtækisins sem síðan ber ábyrgð gagnvart borgarstjóra sem ber ábyrgð gagnvart borgarráði og borgarstjórn.

Lærdómur

Ein hugmynd hefur komið inn í umræðuna út frá stjórnsýsluforsendum að það þurfi að gæta þess að sama fólkið sé ekki á mörgum stöðum í stjórnsýslukeðjunni. 

Stjórnsýslukeðjan er borgarstjórn og borgarráð => Borgarstjóri => Stjórn OR.

Stjórn OR => Forstjóri (forstjóri er starfsmaður stjórnar)
Stjórn OR => Stjórn REI (eða annarra dótturfélaga) 

Í dag er sama fólkið út um allt í þessari keðju.  Meirihluti borgarráðs situr í stjórn OR og á að hafa eftirlit með störfum sjálfs sín.  Nú er talað um að einn borgarfulltrúa og stjórnarmeðlima í stjórn OR taki við stjórnarformennsku REI.  Það þýðir að Júlíus Vífill borgarfulltrúi á að hafa eftirlit og hugsanlega segja upp Júlíusi Vífli stjórnarmanni í OR sem aftur á að gera það sama við Júlíus Vífil stjórnarmann í REI.  Nú tek ég Júlíus einungis sem dæmi þar sem sambærilegir árekstrar eru alls staðar í gangi í kerfinu.

Hefði Villi greitt atkvæði á fundinum með sama hætti ef hann (borgarstjórinn) hefði ekki líka verið í stjórn OR? Þar var í raun einn stjórnarmanna kominn með einvaldsrétt til ákvarðanna í stað þess að Villi kæmi að málinu sem fulltrúi borgarstjórnar, þ.e. eigenda (s.b. eigendafundur).

Væri ekki eðlilegra út frá stjórnsýslulegum forsendum að borgarstjórn þyrfti að skipa einhvern utan sinna raða í stjórn OR og annarra sambærilegra fyrirtækja?  Það kæmi í veg fyrir hagsmunaárekstra þegar borgarráð á að fara að gagnrýna störf stjórnar OR sem, að miklu leyti, er skipuð sama fólkinu og situr í borgarráði.  Dæmi um nýja stjórn OR gæti verið fráfarandi stjórn með Bryndísi Hlöðversdóttur í broddi fylkingar.  Þar var öflug stjórn sem tók við á erfiðum tímum en skorti tilfinnanlega umboð til athafna í málefnum REI.

Svolítið merkilegt að þetta skyldi ekki koma fram í skýrslunni.  Ætli það sé vegna þess að menn vilja halda í stólana?

Yfirlýsing frá Vilhjálmi Þ. Vilhjálmssyni

Rannsóknarrétturinn skoðar sjálfa sig og vini sína - Ekki pappírsins virði!!

1. Þetta er að sjálfsögðu kjarninn í málinu.  Það er í raun merkilegt að fólk skuli ræða svona mikið um efni skýrslunnar því hún er auðvitað mínus-trúverðug.  Aðalspurningin er auðvitað hvað fór EKKI inn í skýrsluna vegna þess að ekki náðist "málamiðlun"/´"sátt" um það?  Væntanlega allt sem ekki hentaði þeim sem voru í hópnum.  Alla vega ekki "sáttar"-málið hennar Svandísar.

2. Sigmar stóð sig nokkuð vel í kvöld.  Verulega mun betur en Helgi í gærkvöldi sem lapti allt beint upp úr skýrslunni gagnrýnislaust.  Sigmar jarðaði skýrsluna. 

3. Akurnesingarnir stóðu sig líka vel.  Borgarfulltrúar Reykjavíkur hafa gert allt gagnvart meðeigendunum í þessu máli sem þeir eru að skamma Villa fyrir að hafa gert gagnvart sér.  Athyglisvert!

4. Stóra málið er hins vegar óafgreitt.  Hvernig og hvenær kemst REI af stað aftur?  Nú er söluskrifstofa íslensks jarðvarma búin að vera lokuð í fjóra mánuði og á meðan hafa tækifærin rúllað hjá.  Ekkert er ákveðið um framhaldið.  Eigendur OR (Reykvíkingar, Akurnesingar og íbúar Borgarbyggðar) tapa fúlgum fjár á hverjum einasta degi sem REI er lokað.  Indónesarnir sem var verið að ræða við í haust...skyldu þeir ennþá vilja tala við Íslendinga eða ætli þeir telji stjórnmálaástandið of veikt til að fara út í langtímasamstarf um virkjanir?
Skaðinn er gríðarlegur sem þessi vitleysa hefur valdið.  Allur tíminn sem fór í að gera þessa ekki-skýrslu.  Nú verður að taka af skarið og koma útrásinni aftur í gang.  Það er forgangsverkefni og ef borgarfulltrúarnir væru ekki svona sjálfhverfir þá sæu þeir það líka.

5. Hver verða viðbrögð Geysir Green?  Ætli þeir fari í mál?  Ætli allt draslið verði bara sameinað inn í ENEX?

Bæjarráð Akraness furðar sig á birtingu REI-skýrslu

Verður gullkálfinum slátrað?

Hver skyldi verða niðurstaða hópsins?  Verður eitthvað farið eftir niðurstöðu hópsins?  Nær hópurinn einhverri niðurstöðu?

Tvö mál hafa helst lekið út úr vinnu hópsins:

1) Sú hugmynd að flytja eignir REI yfir í Geysi Green og að REI kaupi síðan hlut í Geysi Green.  Þá sitjum við uppi með nákvæmlega eins fyrirtæki að við gerðum í upphafi þegar flytja átti eignirnar í hina áttina, þ.e. úr Geysi Green yfir í REI.  Eini munurinn er sá að búið er að henda 10 milljörðum sem búið var að semja um fyrir Reykvíkinga, Akurnesinga og Borgfirðinga út um gluggann og munu þessir eigendur OR ekki fá arð af þeim og því ekki nýta það fé til góðra verka.

2) Hin hugmyndin er sú að senda Orkuveituna tíu ár aftur í tímann og gera það að gamaldags borgarstofnun.  Í dag starfar fyrirtækið eins og hvert annað fyrirtæki einkaréttarlegs eðlis þótt það sé í eigu sveitarfélaganna.  Þetta þýðir t.d. að fyrirtækið getur gert einstaklingsbundna samninga við sína starfsmenn þurfi það t.d. að koma í veg fyrir að þeir flytji sig til samkeppnisaðila innanlands eða utan.  Verði þessi hugmynd að veruleika mun fyrirtækið ekki geta brugðist við þessu lengur heldur verða að gera sambærilega samninga við hópa samkvæmt flóknum kerfum sem ekki er hægt að laga að einstaklingum, framboði eða eftirspurn eða bregðast við þróun á markaði.  Þetta mun auðvitað gefa tóninn og draga verulega úr því hversu auðvelt verður að halda í gott fólk hjá fyrirtækinu. 

Orkuveitan er viðurkennd eitt fremsta fyrirtæki heims á sínu sviði.  Er það tilviljun?  Fyrirtækið er lifandi, tekur sífelldum breytingum og er í stöðugri þróun.  Var það sama hægt að segja um gömlu veiturnar?  Hjá fyrirtækjum Reykjavíkurborgar er mikil mannekla og borginni gengur illa að haldast á fólki.  Það er ekki vandamál hjá OR.  1,5 milljarður er greiddur út árlega til eigenda fyrirtækisins.  Fari það á fullt í útrás má gera ráð fyrir að sú upphæð geti aukist verulega á næstu árum og áratugum.

Ætlum við að slátra gullkálfinum?

REI-skýrslan væntanleg

Framkvæmdavaldið vill halda í sitt...

Þetta er auðvitað sjálfsögð tillaga frá Ellerti og algjörlega fáránlegur útúrsnúninugur hjá Birgi.  Það er auðvitað minnsta mál að hraðsenda skjöl til undirskriftar með diplómatapósti til forseta á hótel þar sem hann dvelur hverju sinni og síðan aftur heim.  Slíkt er gert alla daga allt árið út um allan heim.

Raunveruleg ástæða þessa er sú að framkvæmdavaldið (sem stýrir löggjafarvaldinu) vill auðvitað helst ná að undirrita lög landsins sjálft án aðkomu forsetans.  Framkvæmdavaldið semur í dag lagafrumvörp, ræðir þau, leiðir umræðuna og samþykktir á Alþingi fyrir hönd löggjafarvaldsins, staðfestir síðan eigin lög sem handhafar forsetavalds og skipar loks dómarana sem eiga að fjalla um vafamálin fari lögin fyrir dómstóla.

Það er auðvitað skoðun fulltrúa framkvæmdavaldsins að leiðindaákvæði eins og að forseti geti vísað störfum þeirra til þjóðarinnar sé auðvitað argasta vesen og komi í veg fyrir að þeir hafi fulla og einhliða stjórn á öllu ferlinu frá a til ö.

Það sem þarf að taka til gagngerrar endurskipulagningar í stjórnskipulagi Íslands er samtvinnun framkvæmdavalds, löggjafarvalds og dómsvalds og byrja á því að fjarlægja ráðherra út af Alþingi Íslendinga.  Staða forsetans er í fínu lagi og mjög gott að hann sé utan við fyrrnefnda þrískiptingu og hafi þannig eingöngu skyldur gagnvart þjóðinni.

Staðfesting laga með SMS?